DHA Lahore ke Usool

Wo qawaneen jin par hamari site ka har hindsa aur har page banta hai — zameeni survey, DHA ke naqshe aur tajurbe se.

Last updated:

1. Plot ki tareef — number wala hi plot hai

Plot sirf wo hai jis par DHA ke naqshe mein plot-number likha ho.

Jis polygon par number nahi wo green area ho sakta hai, un-planned raqba ho sakta hai, koi bacha hua tukra ho sakta hai — magar plot nahi.

Is liye hamari har ginti mein sirf number-wale plots shamil hote hain.

2. Paimaish — marla aur kanal

DHA Lahore mein 1 Marla = 225 square feet, aur 1 Kanal = 20 Marla = 4,500 square feet.

Naqshe par plot ki paimaish bilkul poori nahi aati (thori kami-beshi hoti hai), is liye har size ka aik band hai: jo plot kisi size se aadha marla kam ya aadha marla zyada ho, wo usi size mein gina jata hai.

Misal: 1,013 se 1,237 square feet tak ka plot 5 Marla ke khane mein aata hai (5 Marla = 1,125 sq ft).

3. Cutting aur size — do alag cheezein

Cutting plot-number se hoti hai: block ki planning mein number ki hadein batati hain ke kaun si qatar kis size ki cutting hai.

Plot ka apna (exact) size alag cheez hai — mumkin hai 7 Marla ka plot 5-Marla cutting mein ho. Aisi soorat mein cutting 5 Marla kehlaye gi, magar plot 7 Marla hi kehlaye ga.

Misal — Phase 9 Prism, Block R (zameeni tasdeeq-shuda):

  • 1 Kanal cutting: plot 1 se 271
  • 10 Marla cutting: plot 272 se 326, aur 694 se 728
  • 5 Marla cutting: plot 327 se 693, aur 729 se 3413 (block ka aakhri number 3413 hai)

Har phase ke har block mein yehi nizam chalta hai; blocks ki hadein zameeni survey se tasdeeq ho kar isi site par lagti jayengi.

4. Point-size ka qanoon

Point wale sizes (5.75, 5.5 waghaira) apne se neeche wale poore marla mein ginte hain — 5 se 6 tak sab 5 Marla.

Headings aur pages mein point kabhi nahi likha jata.

5. Size ka naqsha-muqaddam qanoon

Jo plot-number agent bataye, hum pehle usay DHA ke naqshe par dekhte hain aur size wahin se likhte hain.

Agent ka likha size naqshe se takraye to hum donon dikhate hain aur us par “jaanch mein” ka nishan lagta hai — jhoot chhupta nahi.

Fi-marla qeemat bhi naqshe ke size se banti hai.

6. Data ki tarjeeh

Sab se muqaddam: hamara apna zameeni (paidal) survey.

Phir: DHA ka naqsha (GIS).

Aakhir mein: agent ka message ya kisi aur zariye ka data.

Jahan takrao ho, oopar wala neeche wale par muqaddam hai.

7. Level plot

Level plot wo hai jo road ke barabar bhara hua ho.

Khali plot ke sath lazmi likha jata hai ke wo level hai, ya road se kitna neecha hai (bharai kitni chahiye).

8. Pair plot ka qanoon

Pair (jora) alag size nahi — fi-plot size se likha jata hai, jaise “1 Kanal Pair (2 Kanal)”.

Pair Residential aur Commercial plots ki sub-category hai, aur is mein triplet bhi shamil ginte hain.

9. Tareekh aur waqt ka qanoon

Har market-property ke sath uski aakhri update ki tareekh AUR waqt likha jata hai — dono lazmi hain.

10. Sale aur Rent hamesha alag

Sale aur Rent kabhi aik khane, aik button ya aik ginti mein ikathe nahi hote — har jagah alag.

Ye khazana barhta rahega

Jab bhi koi naya usool tay hoga, isi page par likha jayega — taake hamara aur aap ka ilm aik jagah jama rahe.